ഗൗരിയുടെ പാട്ടു കേട്ടാൽ ആരും നൃത്തച്ചുവടുകൾ വച്ചു പോകും

വർഷങ്ങൾക്ക് മുൻപൊരു സായാഹ്നത്തിലെ ഒരു കുടുംബ സംഗമം, പല കുട്ടികളും തന്റെ കഴിവുകൾ വേദിയിൽ അവതരിപ്പിക്കുന്ന നിമിഷങ്ങൾ, അവിടെ ഒരു പത്തു വയസ്സുകാരി താൻ രചിച്ച പാട്ട് ഈണമിട്ടു അവതരിപ്പിച്ചു, വേദിയിലിരുന്ന പ്രശസ്ത സംവിധായകൻ റോഷൻ ആൻഡ്രൂസിന്റെ ശ്രദ്ധയിൽ അത് പതിഞ്ഞു, പിന്നീട് റോഷന്റെ സംവിധാനത്തിൽ മോഹൻലാൽ നായകനായെത്തിയ കാസനോവ എന്ന ചിത്രത്തിലെ ഒരു ഗാനമായി ആ പാട്ട് തിരഞ്ഞെടുക്കപ്പെട്ടു. ആ പാട്ടിന് ഈണം നൽകിയ പെൺകുട്ടിയാണ് ഇന്നത്തെ പ്രശസ്ത ഗായികയായ ഗൗരി ലക്ഷ്മി.
ഗായിക, ഗാനരചയിതാവ്, സംഗീത സംവിധായിക എന്നിങ്ങനെയുള്ള വിശേഷണങ്ങളുള്ള ഗൗരി ലക്ഷ്മി, പാട്ട് കൊണ്ടും നൃത്തച്ചുവടു കൊണ്ടും മ്യൂസിക് ബാൻഡിനെ  മറ്റൊരു തലത്തിൽ എത്തിച്ച ഒരാളുകൂടിയാണ്. ഇന്നത്തെ യുവതലമുറയുടെ ഭാഷയിൽ പറഞ്ഞാൽ ഗൗരിയുടെ ഷോ ഒരു പ്രത്യേക വൈബ് തന്നെയാണ്. വെറുമൊരു ലൈവ് പെർഫോമൻസിനുപരി സമൂഹത്തിന് പല സന്ദേശങ്ങളും ഗൗരിയുടെ പാട്ടിലൂടെ ലഭിക്കാറുണ്ട്. ഗൗരിയുടെ വിശേഷങ്ങളിലേക്ക് കടക്കാം.

ഇന്ത്യയിലെ ഏറ്റവും  പ്രായം കുറഞ്ഞ   കമ്പോസർ

 വളരെ ചെറുപ്പത്തിലെ കവിതകൾ രചിക്കുകയും അതിനീണം പകരുകയും ആയിരുന്നു ഗൗരിയുടെ ഹോബി. സ്കൂളിലെ ആർട്സിൽ എല്ലാം സജീവമായിരുന്നെങ്കിലും, ഒരു കുടുംബ സംഗമത്തിൽ വച്ചാണ് ഗൗരിയുടെ ജീവിതം മാറി മറിഞ്ഞത്. ഗൗരി രചിച്ച സഖിയെ എന്ന ഗാനത്തിന് ആയിരുന്നു വലിയ സ്വീകാര്യത കിട്ടിയത്. ഇന്ത്യയിലെ ഏറ്റവും പ്രായം കുറഞ്ഞ  കമ്പോസർ എന്ന വിശേഷണം കൂടെ ഗൗരിയെ തേടിയെത്തി. കുഞ്ഞായതിനാൽ അതിന്റെ മൂല്യം എത്രയുണ്ടെന്ന് അന്ന് എനിക്ക് അറിയുമായിരുന്നില്ല. സ്കൂളിൽ എല്ലാം പോകുമ്പോൾ പലരും അഭിനന്ദിച്ചതും എല്ലാം ഞാൻ ആസ്വദിക്കുന്നുണ്ടായിരുന്നെങ്കിലും, അതിനെപ്പറ്റി കൂടുതൽ ഒന്നും എനിക്ക് മനസ്സിലാകുന്നുണ്ടായിരുന്നില്ല. കാസനോവയുടെ മൂവി ലോഞ്ച് ബാംഗ്ലൂരിലായിരുന്നു, അതൊക്കെയും വളരെ കൗതുകത്തോടെയാണ് നോക്കി കണ്ടിരുന്നത്. എന്നാൽ ഇന്ന് അതിന്റെ മൂല്യം എല്ലാം എനിക്ക് മനസ്സിലാകുന്നുണ്ട്. എത്രത്തോളം വലിയ സ്ഥാനമാണ് എനിക്ക് കിട്ടിയതെന്നും അന്നാളിൽ തോന്നിയിരുന്നില്ലെങ്കിലും ഇന്ന് എനിക്ക് അത് നന്നായി ബോധ്യമുണ്ട്.

 ഒരു പാട്ടുകാരിയാകണം എന്നൊന്നും ആഗ്രഹിച്ചിരുന്നില്ല. പണ്ടൊക്കെ ഒരുപാട് ആഗ്രഹങ്ങൾ എല്ലാവർക്കും ഉള്ളതുപോലെ എനിക്കും ഉണ്ടായി കാണണം. അതിനു വേണ്ടി ഒരുപാട് പരിശ്രമിക്കുകയൊന്നും ചെയ്തിട്ടില്ല. ഒരു ജേണലിസ്റ്റ് ആകണം എന്നുണ്ടായിരുന്നു. കൂടാതെ ഇന്റീരിയർ ഡിസൈനിങ്ങിലും എനിക്ക് ഒരുപാട് താല്പര്യമുണ്ടായിരുന്നു. അതിലേക്ക് എത്തിപ്പെടാൻ ഒരുപാട് പരിശ്രമിച്ചിട്ടില്ല എങ്കിലും, ഒരു ജേണലിസ്റ്റ് ആകണമെങ്കിൽ ഉള്ള പൊതുവിജ്ഞാനത്തെ പറ്റി എനിക്ക് അറിയാമായിരുന്നു. അതുകൊണ്ട് അന്നും ഇന്നും ഒരു ശരാശരി അറിവ് നേടാൻ  ശ്രമിക്കാറുണ്ട്. ഇനി ഇന്റീരിയർ ഡിസൈനിങ്ങിന്റെ കാര്യം പറയുകയാണെങ്കിൽ എന്റെ വീടിന്റെ ഇന്റീരിയർ ഡിസൈനിങ് ഞാൻ തന്നെയാണ് ചെയ്തത്. അതിനായി പല സമൂഹമാധ്യമങ്ങളും റഫറൻസിനായി ഉപയോഗിച്ചിരുന്നു. ഏതെങ്കിലും വിഷയം ഇഷ്ടമായാൽ അതിൽ ആഴത്തിൽ ഇറങ്ങിച്ചെല്ലാൻ എനിക്ക് ഒരുപാട് ഇഷ്ടമാണ് അതിനായി ഞാൻ പരിശ്രമിക്കാറുണ്ട്.

പ്ലേ ബാക്ക് സിങ്ങർ

 മലയാളത്തിലും, തെലുങ്കിലും തമിഴിലുമായി ഒരുപാട് പാട്ടുകൾക്ക് പിന്നണിഗായികയായി പ്രവർത്തിച്ചിട്ടുണ്ട്. മലയാളത്തിലെ 7 സുന്ദരരാത്രികൾ, പുത്തൻ പണം, ഞാൻ പ്രകാശൻ, ലവ് ആക്ഷൻ ഡ്രാമ, ജൂൺ,ഗോദ തുടങ്ങി നിരവധി ചിത്രങ്ങളിൽ പാട്ട് പാടിയിട്ടുണ്ട്. തെലുങ്കിൽ ഷാൻ റഹ്മാന്റെ സംഗീതത്തിൽ ഒരു ഗാനം ആലപിച്ചു. കൂടാതെ മറാട്ടിയിലും പാടാനുള്ള അവസരം ലഭിച്ചു. ആദ്യമായി പ്ലേബാക്ക് സിംഗർ എന്ന പട്ടം എനിക്ക് കിട്ടിയത് ലാൽജോസിന്റെ 7 സുന്ദരരാത്രികളിൽ ആണ്.

ഒരു ചെയ്ഞ്ച് ആരാണ് ആഗ്രഹിക്കാത്തത്

 ഗ്രാമത്തിൽ വളർന്ന ഒരു കൊച്ചു പെൺകുട്ടിയായിരുന്നു ഗൗരി. ഇന്നിപ്പോൾ ഗൗരി ആകെ അടിമുടി മാറിയിരിക്കുന്നു. അത് ലുക്കിൽ ആയാലും, ആറ്റിറ്റ്യൂഡിൽ ആയാലും ആളിപ്പോൾ ഒന്ന് ഒന്നുകൂടെ ചില്ലാണ്. ഈ ഒരു ട്രാൻസ്ഫർമേഷനെ പറ്റി ഗൗരി പറഞ്ഞത് ഇങ്ങനെയാണ്, എപ്പോഴും നാടോടുമ്പോൾ നടുവേ ഓടുക എന്ന തത്വമാണ് ഞാനെന്റെ ജീവിതത്തിൽ പ്രയോഗിക്കാറുള്ളത്. മാറ്റങ്ങൾ എനിക്ക് ഒരുപാട് ഇഷ്ടമാണ്, ഇപ്പോഴത്തെ പുതുതലമുറയെയാണ് ഞാൻ നോക്കുന്നത്. അവരുടെ രീതികൾ എങ്ങനെയാണ് എന്നതിനനുസരിച്ച് ഞാൻ എന്റെ ലുക്കിലും ഭാവത്തിലും മാറ്റങ്ങൾ വരുത്തി. അത് എന്റെ ഈ ഫീൽഡിന് അനിവാര്യവുമാണ്. അതിനായി ഞാൻ കൂടുതൽ സൗന്ദര്യസംരക്ഷണമോ കാര്യങ്ങളോ ഒന്നും തന്നെ ചെയ്യാറില്ല എങ്കിലും എന്റെ ഈ ലുക്ക് എല്ലാവരും ഏറ്റെടുത്തു എന്നതിൽ ഒരുപാട് സന്തോഷമുണ്ട്. ഒരിക്കൽ ഒരു ഇന്റർവ്യൂവിൽ മൈത്രേയൻ പറഞ്ഞതുപോലെ, നമ്മൾ നമ്മളോട് തന്നെ സമരം ചെയ്യുക എന്നതുണ്ട്. എവിടെയും നമ്മൾ സ്റ്റക്ക് ആകാതെ ഇരിക്കുക എന്ന് എനിക്കും തോന്നാറുണ്ട്. ഒരു പ്രായം കഴിയുമ്പോൾ ഇതുവരെ മാത്രം നിന്നു പോകണം എന്നുള്ളവരാണ് പലരും, അങ്ങനെയാണ് പലരും ചിന്തിക്കുന്നത്. ഇപ്പോ ഉള്ള ജനറേഷൻ എന്താണ്  ചെയ്യുന്നത് എന്നൊക്കെയാണ് ഞാൻ നോക്കുന്നത്. അതിനനുസരിച്ച് നീങ്ങാറുമുണ്ട്.

നെഗറ്റീവ് കമന്റ്സ് ഒരുതരത്തിൽ പോസിറ്റീവ് അല്ലേ

 യൂട്യൂബിൽ എന്റെ പാട്ടുകൾക്ക് കീഴെ വരുന്ന എല്ലാ കമന്റ്സും ഞാൻ ഇരുന്നു വായിക്കാറുണ്ട്, അതിൽ നെഗറ്റീവ് കമന്റ്സും ഉണ്ടാകും അതുപോലെ തന്നെ പോസിറ്റീവായ കമന്റുകളും ധാരാളം വരാറുണ്ട്, പാരഗ്രാഫ് കണക്കിന് കമന്റുകൾ ആളുകൾ ഇടാറുണ്ട് അപ്പോൾ എനിക്ക് കൂടുതൽ സന്തോഷമാണ്. അയാളുടെ അത്രയും സമയം അതിനായി മാറ്റി വയ്ക്കുമ്പോൾ ആ പാട്ടിന് എത്രമാത്രം റീച്ച് കിട്ടി എന്ന് എനിക്ക് മനസ്സിലാകാറുണ്ട്. നെഗറ്റീവ് മന്റ്സിനോടുള്ള എന്റെ ഒരു സമീപനം എന്നുവച്ചാൽ അയാൾ എങ്ങനെയായിരിക്കും ഇരിക്കുന്നത് എന്നോർത്തിട്ടുള്ള ഒരു മോഡ് ഓഫ് സിമ്പതി എന്റെ മനസ്സിൽ എനിക്ക് തോന്നാറുണ്ട്. അപ്പോൾ ഞാൻ ഓർക്കുന്നത് ഒന്നാണ്, വേറെ ഒരു കൂട്ടം ആളുകളിലേക്ക് കൂടെ ഞാൻ എത്തിപ്പെട്ടിരിക്കുന്നു എന്നതാണല്ലോ അതിനർത്ഥവും. അപ്പോൾ അതും ഒരു പോസിറ്റീവ് അല്ലേ. ഗൗരി ചിരിച്ചു.
 ഇനി മുറിവിന്റെ മൂന്നാമത്തെ ട്രാക്ക് കൂടെ ഇറക്കാനുള്ള പുറപ്പാടിലാണ് ഗൗരി. കൂടാതെ ചെമ്പൻ വിനോദ് നായകനാകുന്ന ഇടി മഴ കാറ്റ് എന്ന മൂവിയിലും വർക്ക് ചെയ്യുന്നുണ്ട്.

കോളെജ് പിള്ളേരെ ഒത്തിരി ഇഷ്ടമാണ്

 നാട്ടിലും വിദേശത്തുമായി നിരവധി ഷോകളാണ് ഗൗരിയെ തേടിയെത്തുന്നത്. ഏത് ക്രൗഡിനെയാണ് കൂടുതൽ ഇഷ്ടം എന്നുള്ള ചോദ്യത്തിന് ഗൗരിക്ക് ഒന്നേ പറയാനുള്ളൂ, അത് നമ്മുടെ കോളേജ് പിള്ളേർ തന്നെ. അവരുടെ കൂടെയുള്ള ഒരു വൈബ് അത് വേറെ തന്നെയാണ്. ഗൗരി പറയുന്നു. വിദേശത്ത് നിന്നും വരുന്ന വിളികൾ കൂടുതലും അവിടെ ജോലി കിട്ടി സെറ്റിൽഡ് ആയിട്ടുള്ളവരാണ്. അവർ അപ്പോൾ അതിനെ കൂടുതലും ഔദ്യോഗികമായാണ് കാണാറുള്ളത്. എന്നാൽ കോളേജിൽ അങ്ങനെയല്ല, ആ ഒരു ദിവസം അവർ അടിച്ചുപൊളിക്കാമെന്നാണ് കരുതുന്നത്. അതുകൊണ്ടുതന്നെ ഷോ അതിന്റെ ഏറ്റവും നല്ല രീതിയിൽ തന്നെ അവർ എൻജോയ് ചെയ്യുന്നത് കാണുമ്പോൾ ഒത്തിരി സന്തോഷമാണ്.

പതിനഞ്ചു പേരുടെ ക്രൂ ആണ് ഞങ്ങളുടേത്, തുടക്ക കാലത്ത് ഒരുപാട് സ്ട്രഗിൽ ചെയ്യേണ്ടി വന്നിട്ടുണ്ട്, ഒരുപാട് പരിഹാസങ്ങളും കുത്തുവാക്കുകളും കേട്ടിട്ടുണ്ട് എന്നാൽ ഇന്നിപ്പോൾ കുറേക്കൂടെ സേഫ് ആയ സ്ഥാനത്താണെന്ന് തോന്നാറുണ്ട്.