ദ്രൗപദി മുർമു: കനൽവഴികൾ താണ്ടി രാഷ്ട്രപതി ഭവനിലേക്ക്

ഭാരതത്തിന്റെ ചരിത്രരേഖകളിൽ തങ്കലിപികളാൽ എഴുതപ്പെട്ട പേരാണ് ശ്രീമതി ദ്രൗപദി മുർമുവിന്റേത്. ഒഡിഷയിലെ ഒരു ഉൾഗ്രാമത്തിൽ ജനിച്ചുവളർന്ന ഒരു പെൺകുട്ടി രാജ്യത്തിന്റെ പരമോന്നത പദവിയിലെത്തുമ്പോൾ, അത് കേവലം ഒരു വ്യക്തിയുടെ വളർച്ചയല്ല, മറിച്ച് ഇന്ത്യൻ ജനാധിപത്യത്തിന്റെ തന്നെ വിജയമാണ്. നിശ്ചയദാർഢ്യവും ആത്മവിശ്വാസവും ഉണ്ടെങ്കിൽ ഏതൊരു സാധാരണക്കാരനും രാജ്യത്തിന്റെ നെറുകയിലെത്താം എന്നതിന്റെ ജീവിക്കുന്ന തെളിവാണ് അവർ.

ബാല്യവും വിദ്യാഭ്യാസവും

1958 ജൂൺ 20-ന് ഒഡിഷയിലെ മയൂർഭഞ്ച് ജില്ലയിലെ ഉപർബേഡ എന്ന ഗ്രാമത്തിലാണ് ദ്രൗപദി മുർമു ജനിച്ചത്. സാന്താൾ ഗോത്രവർഗ വിഭാഗത്തിൽപ്പെട്ട അവർക്ക് വിദ്യാഭ്യാസം എന്നത് അക്കാലത്ത് വലിയ ബുദ്ധിമുട്ടായിരുന്നു. ഗ്രാമത്തിൽ വൈദ്യുതിയും റോഡുകളും ഇല്ലാതിരുന്ന കാലത്ത് മണ്ണെണ്ണ വിളക്കിന്റെ വെളിച്ചത്തിലാണ് അവർ പഠിച്ചത്. പ്രതിസന്ധികൾക്കിടയിലും ഭുവനേശ്വറിലെ രമാദേവി വിമൻസ് കോളേജിൽ നിന്ന് ബിരുദം നേടിയതോടെ, തന്റെ ഗ്രാമത്തിൽ നിന്ന് ബിരുദധാരിയാകുന്ന ആദ്യ വനിതയായി ദ്രൗപദി മാറി.

അധ്യാപികയിൽ നിന്ന് ജനപ്രതിനിധിയിലേക്ക്

തന്റെ ഔദ്യോഗിക ജീവിതം ഒഡിഷ സർക്കാർ സർവീസിൽ ഒരു ക്ലർക്കായിട്ടാണ് അവർ തുടങ്ങിയത്. എന്നാൽ സാമൂഹിക സേവനത്തോടുള്ള അഭിനിവേശം അവരെ അധ്യാപന രംഗത്തേക്ക് എത്തിച്ചു. ശ്രീ അരബിന്ദോ ഇന്റഗ്രൽ എഡ്യൂക്കേഷൻ സെന്ററിൽ ശമ്പളം പോലും വാങ്ങാതെ അധ്യാപികയായി സേവനമനുഷ്ഠിച്ച അവർ നാട്ടുകാരുടെ പ്രിയപ്പെട്ട ‘ദിദി’യായി. 1997-ൽ റായ്രംഗ്പൂർ നഗർ പഞ്ചായത്ത് കൗൺസിലറായി തിരഞ്ഞെടുക്കപ്പെട്ടതോടെയാണ് അവരുടെ രാഷ്ട്രീയ ജീവിതം ആരംഭിക്കുന്നത്.

രാഷ്ട്രീയ നേട്ടങ്ങളും അംഗീകാരങ്ങളും

രാഷ്ട്രീയത്തിൽ വളരെ പെട്ടെന്നുതന്നെ തന്റെ വ്യക്തിമുദ്ര പതിപ്പിക്കാൻ അവർക്ക് സാധിച്ചു.

2000 മുതൽ 2004 വരെ ഒഡിഷയിലെ ബി.ജെ.പി-ബി.ജെ.ഡി സഖ്യ സർക്കാരിൽ ഗതാഗതം, വാണിജ്യം, ഫിഷറീസ്, മൃഗസംരക്ഷണം എന്നീ വകുപ്പുകളുടെ മന്ത്രിയായി മികച്ച രീതിയിൽ അവർ പ്രവർത്തിച്ചു.

2007-ൽ ഒഡിഷ നിയമസഭയിലെ ഏറ്റവും മികച്ച എം.എൽ.എയായി അവർ തിരഞ്ഞെടുക്കപ്പെട്ടു. ഒരു ജനപ്രതിനിധിയുടെ പ്രവർത്തന മികവിനുള്ള വലിയ അംഗീകാരമായിരുന്നു ഇത്, അത് അവർക്ക്നീൽകണ്ഠ പുരസ്കാരം നേടികൊടുത്തു.

തളർത്താത്ത ദുരന്തങ്ങൾ

ജീവിതം വിജയകരമായി മുന്നോട്ട് പോകുമ്പോഴാണ് വിധി അവരെ ക്രൂരമായി പരീക്ഷിച്ചത്. 2009 മുതൽ 2014 വരെയുള്ള കാലയളവിൽ തന്റെ ഭർത്താവിനെയും രണ്ട് ആൺമക്കളെയും അവർക്ക് നഷ്ടമായി. ആർക്കും താങ്ങാനാവാത്ത ഈ വലിയ നഷ്ടങ്ങൾ അവരെ മാനസികമായി തളർത്തിയെങ്കിലും, ജനസേവനത്തിലൂടെയും ആത്മീയതയിലൂടെയും അവർ തിരികെ വന്നു. തന്റെ വീട് ആൺമക്കളുടെ സ്മരണയ്ക്കായി ഒരു സ്കൂളാക്കി മാറ്റി അവർ മാതൃകയായി.

ഗവർണർ എന്ന നിലയിലുള്ള ചരിത്രനേട്ടം

2015 മെയ് 18-ന് ദ്രൗപദി മുർമു ജാർഖണ്ഡിന്റെ ഒൻപതാമത് ഗവർണറായി സത്യപ്രതിജ്ഞ ചെയ്തു. ഒരു ഇന്ത്യൻ സംസ്ഥാനത്തിന്റെ ഗവർണറാകുന്ന ആദ്യ ഗോത്രവർഗ വനിതയും ജാർഖണ്ഡിന്റെ ആദ്യ വനിതാ ഗവർണറുമായിരുന്നു അവർ. ആറ് വർഷത്തിലധികം ആ പദവിയിൽ തുടർന്ന അവർ, ഗോത്രവർഗക്കാരുടെ അവകാശങ്ങൾ സംരക്ഷിക്കുന്നതിലും ഉന്നത വിദ്യാഭ്യാസ രംഗത്തെ പുരോഗതിയിലും വലിയ പങ്ക് വഹിച്ചു.

രാഷ്ട്രപതി പദവിയിലെ സുവർണ്ണ നേട്ടങ്ങൾ

2022 ജൂലൈ 25-ന് ഇന്ത്യയുടെ പതിനഞ്ചാമത് രാഷ്ട്രപതിയായി അവർ ചുമതലയേറ്റു. നിരവധി റെക്കോർഡുകളാണ് ആ പദവിയിലൂടെ അവർ സ്വന്തമാക്കിയത്
ആദ്യ ഗോത്രവർഗ രാഷ്ട്രപതി, ഇന്ത്യയുടെ പരമോന്നത പദവിയിലെത്തുന്ന ആദ്യ ആദിവാസി വിഭാഗക്കാരി, ഏറ്റവും പ്രായം കുറഞ്ഞ രാഷ്ട്രപതി, രണ്ടാമത്തെ വനിതാ രാഷ്ട്രപതി അങ്ങെനെ തുടരുന്നു അവരുടെ നേട്ടങ്ങൾ..

ദ്രൗപദി മുർമുവിന്റെ ജീവിതം ഒരു വലിയ സന്ദേശമാണ് നമുക്ക് തരുന്നത്. ഏറ്റവും താഴെത്തട്ടിൽ ഉള്ളവർക്കും കഠിനാധ്വാനത്തിലൂടെ വിജയത്തിന്റെ കൊടുമുടികൾ കീഴടക്കാം എന്ന് അവർ ലോകത്തിന് കാണിച്ചുകൊടുത്തു. ലാളിത്യവും വിനയവും കൈവിടാതെ ഭാരതത്തിന്റെ പ്രഥമ പൗരയായി അവർ ശോഭിക്കുമ്പോൾ, അത് ഓരോ ഇന്ത്യക്കാരന്റെയും അഭിമാനമായി മാറുന്നു. തന്റെ ജീവിതം പാർശ്വവൽക്കരിക്കപ്പെട്ട ഓരോ ജനവിഭാഗത്തിനും വേണ്ടിയുള്ളതാണെന്ന് അവർ തന്റെ പ്രവർത്തികളിലൂടെ തെളിയിച്ചു കൊണ്ടിരിക്കുന്നു.